Кассада фискалдаумен қалай жұмыс істеу керек

Фискалдық ауысым — кассадағы жұмыс күніңіз. Ол бірінші фискалды чек басылғанда немесе Ауысымды ашу түймесін басқанда басталады. Ауысым міндетті түрде Z-есепті басып шығарумен аяқталады.

Жұмысты бастамас бұрын Webkassa интеграциясын баптағаныңызды тексеріңіз.

Кассалық ауысымды ашыңыз

Кассамен жұмысты бастау үшін:

1. Планшетте немесе компьютерде кассаға кіріп, қызметкердің ПИН-кодын енгізіңіз.
2. Кассадағы қалдық өрісіне ұсақ ақша үшін қалдыратын соманы енгізіңіз.
3. Фискалдау қосқышын қосыңыз.
4. Ашу түймесін басыңыз.

💡 Таңертең ауысымды ашқанда ұсақ ақшаны енгізіңіз. Сонда ақша жәшігіндегі қолма-қол ақша X-есептегі деректермен сәйкес келеді.

☝️ Ауысым жабылғанша, ауысым ашылған құрылғыны ауыстырмаңыз. Фискалдық токен көбіне құрылғыдағы ағымдағы сессияға байланысты болады.

Қонақтарға қызмет көрсетіп, сатылым жасаңыз

Фискалды чек төлемнен кейін автоматты түрде басылып шығады және салық органына жіберіледі.

1. Тапсырысқа тауарларды қосыңыз.
2. Төлем экранында Фискалдау қосқышы қосулы екенін тексеріңіз.
3. Төлеу түймесін басыңыз.

💡 Фискалдау қосқышы әрқашан қосулы болуы үшін әкімші панелінде Баптаулар → Жалпы бөлімін ашыңыз. Әдепкі бойынша фискалды чектерді басып шығару құсбелгісін қойып, Сақтау түймесін басыңыз.

Чек мәртебесін тексеріңіз

Деректер салық органына жіберілгенін тексеру үшін кассада Түбіртектер мұрағатын ашыңыз. Соманың сол жағындағы индикаторға қараңыз:

🟢 Жасыл — чек сәтті фискалданып, фискалдық деректер операторына жіберілді.

🔴 Қызыл — қате пайда болды. Чекті басып, оны қайта жіберіп көріңіз.

Тауарларды таңбалау

Алкогольмен немесе темекімен жұмыс істесеңіз, жүйе таңбалау кодын сканерлеуді сұрайды. Тауарды чекке қосу үшін бөтелкедегі немесе қаптамадағы шаршы DataMatrix кодын немесе PDF417 кодын сканерлеңіз.

Қайтарым жасап, транзакциялар қосыңыз

Төлем әдісін қате таңдасаңыз немесе басқа қате жіберсеңіз, фискалды чек бойынша қайтарым жасаңыз және оны Poster-ден жойыңыз. Сонда X-есептегі түсім ақша жәшігіндегі сомамен сәйкес келеді.

Ақша жәшігіне қолма-қол ақша салғанда немесе одан ақша алған кезде транзакциялар жасаңыз. Осылай кассадағы сома тиынға дейін дұрыс есептеледі.

• Шығыс — жеткізушілерге төлем, су сатып алу немесе жалақы беру.
• Кіріс — күн ішінде ұсақ ақша қосу.
• Инкассация — күн соңында түсімді сейфке өткізу үшін кассадан алу.

Транзакция жасау үшін жоғарғы оң жақтағы ≡ түймесін басыңыз → Транзакция жасау, түрін таңдаңыз, соманы және пікірді енгізіңіз.

Сатылым сомаларын тексеріңіз

Ауысым ашылғаннан бергі кассадағы фискалдық ақша сомасын тексеру үшін X-есепті алыңыз. Бұл есепті шектеусіз рет жасауға болады. Ол түсімді нөлдемейді.

X-есепті алу үшін:

1. Жоғарғы оң жақтағы ≡ түймесін басыңыз.
2. Фискалдау блогында X-есеп таңдаңыз.

Есептегі Қолма-қол сомасын ақша жәшігіндегі нақты ақшамен салыстырыңыз.

Жұмыс күнінің соңында фискалдық ауысымды жабыңыз

Ауысымды жабу Z-есепті қалыптастырады. Ол күн қорытындысын бекітіп, деректерді салық органына жібереді.

Фискалдық және кассалық ауысымды жабу үшін:

1. X-есеп алыңыз және қолма-қол ақшаны салыстырыңыз.Кассадағы қалдық мына формуламен есептеледі:Қолма-қол айналым − Қолма-қол қайтарым + Кірістер − Шығыстар
2. Инкассация жасаңыз: ≡ → Транзакция жасау → Инкассация түймесін басып, кассадан алатын түсім сомасын көрсетіңіз. Ертеңге тек ұсақ ақшаны қалдырыңыз.
3. X-есепті алып, кассадағы қолма-қол ақша сомасы ертеңге қалатын ұсақ ақша сомасына тең екенін тексеріңіз. Дайын түймесін басыңыз.
4. ≡ түймесін басып, Ауысымды жабу таңдаңыз.
5. Ақша жәшігінде қалдыратын нақты соманы енгізіңіз.
6. Z-есеп қосқышы қосулы екенін тексеріңіз.
7. Ауысымды жабу түймесін басыңыз.

Бірдеңе дұрыс болмаса, не істеу керек

Z-есептегі сома неге нақты қолма-қол ақшамен сәйкес келмейді?

Көбіне кассадан сатып алуға, таксиге немесе инкассацияға ақша алған кезде Poster-де Шығыс транзакциясы жасалмайды. Салық есебінде бұл ақша әлі де ақша жәшігінде тұр деп есептеледі. Есеп дұрыс болуы үшін ақшаның кез келген қозғалысын транзакция қосу арқылы тіркеңіз.

Ауысым жабылмайды және “24 сағаттан артық” қатесі шығады

Ауысымды уақытында жабуды ұмытып кетсеңіз, Poster стандартты жабуды бұғаттауы мүмкін. Қатені түзету үшін планшеттегі Webkassa қолданбасының мәзіріне кіріп, Z-есепті қолмен алыңыз. Содан кейін Poster-де Ауысымды жабу түймесін басыңыз, бірақ Z-есепті басып шығару құсбелгісін міндетті түрде алып тастаңыз. Осылай Z-есеп қайталанбайды.

Интернет жоғалды. Жұмысты жалғастыруға бола ма?

Webkassa автономды режимге өтеді. Чектерді әдетте 72 сағатқа дейін басып шығаруды жалғастыра аласыз. Олар жадта сақталады және байланыс қалпына келгенде автоматты түрде салық органына жіберіледі. Ең бастысы — қате шыққан чектерді қолмен жоймаңыз. Интернет қайта қосылғанын күтіңіз.

Z-есепті Poster-де кассалық ауысымды жаппай тұрып та алуға болады. Ол үшін кассада ≡ түймесін басып, Z-есеп таңдаңыз. Содан кейін ауысымды жапқанда Z-есеп қосқышын өшіруді ұмытпаңыз. Бұл есепті қайта жасамауға көмектеседі.